Novo achado! O mural de Suso de Marcos no Concello

 Grazas a este traballo puidemos preguntar e atopar información sobre o mural feito polo escultor e artista Suso de Marcos, orixinario de Boimorto. 

1. QUEN É SUSO DE MARCOS?

Jesús López García (Suso de Marcos)[1] é un escultor nacido en 1950 en Boimorto.

Xa dende pequeno chama a súa atención a talla, xa que o seu pai realizaba apeiros con madeira. Trasládase posteriormente á Coruña onde compaxina o seu traballo en talleres de artesanía coa formación na Escola de Artes e Oficios. Completa a súa formación na Escola central de Madrid, onde se traslada no ano 1973, traballando con destacados escultores e coñecendo novidosas tendencias vangardistas.

No ano 1975 realiza a súa primeira exposición e ao ano seguinte recibe a terceira medalla en escultura do Certame Nacional de Belas Artes.

En 1979 trasládase a Málaga para ocupar a praza de Axudante de Talla na Escola de Artes Aplicadas e Oficios Artísticos, e en 1992 acada a praza de profesor numerario da materia de Talla en Madeira.

"As súas inquedanzas culturais (exposicións e obras súas lle vinculan á Literatura, á Historia, á Pintura. ..), a súa progresión no emprego de materiais (primeiro, madeira; logo ferro e madeira; máis tarde, cristal, auga, ferro, poliéster, metacrilato, luz artificial...), as súas frecuentes exposicións e os nomeamentos de carácter académico (ingreso en 1986 na  Real Academia de Belas Artes de San Telmo e en 1991 na Real Academia Galega de Belas Artes de A Coruña ), amosan o seu afán de  progreso e perfeccionamento artístico, así como a súa incuestionable valía como escultor"[2].

2. O MURAL DO CONCELLO

Un dato anecdótico que quixeramos ter presente sobre o artista e que enxalza o seu compromiso coa súa terra e co colexio aconteceu cando se lle encargou o mural que preside as escaleiras que dan acceso á primeira planta do edificio do Concello. Foi feito por encargo do equipo de goberno daquela, e recolle elementos do rural galego. O custo da obra foi doado polo autor ao colexio público de Boimorto, en concreto ao curso de 8º de EXB, para que realizasen a excursión de fin de curso a Málaga, onde o escultor agasallou ao grupo con diversos actos culturais, entre eles a asistencia a un concerto da Orquestra de Málaga[3].

Mural e firma do autor, datada en 1990.

---

[1] Web Suso de Marcos [https://susodemarcos.com/].

[2] Biografía Suso de Marcos na web do CPI Armando Cotarelo Valledor [https://www.edu.xunta.gal/centros/cpiarmandocotarelo/?q=taxonomy/term/66&destination=taxonomy%2Fterm%2F66].

[3] Información facilitada por Concha Couso.